Masentro sa suboot unexplained wealth asin mga isyu sa Statement of Assets, Liabilities, and Net Worth (SALN) ni Vice President Sara Duterte an masunod na impeachment hearing kan Kamara, kun sain ipigsugo an pagpapaapod ki dating Senador Antonio Trillanes IV asin pirang ahensya kan gobierno.
Segun ki House Committee on Justice Chairperson Gerville Luistro, nagluwas an komite nin subpoena para kay Trillanes nganing obligaron ini mag-atendir sa ipigtalaang hearing sa maabot na Abril 22.
Si Trillanes an ipigkonsiderar na parte kan Saballa et al impeachment complaint, partikularmente sa orolay kan dae maipaliwanag na yaman kan bise presidente.
Afuera sa dating senador, kinumpirmar man ni Luistro na imbitado ang mga opisyal hale sa Anti-Money Laundering Council (AMLC).
Piglalaoman man an pagsusumite kan mga dokumentong may kinaaraman sa mga bank transactions kan mag-agom na Sara asin Manases Carpio.
Kabale man sa piglalaomang maatendir sa hearing an mga representantes hale sa Securities and Exchange Commission (SEC), Bureau of Internal Revenue (BIR), asin Office of the Ombudsman.
An nakalataang pagtitipon kan komite an masirbing clarificatory hearing nganing linawon an mga paratang laban sa bise presidente, kabale na an suboot bako kumpletong pagdedeklara kan saiyang mga pagrugaring asin yaman.
Minentrastanto, nilinaw ni Luistro na ipinauubaya na niya sa mga miyembro kan komite an pinal na desisyon kun liwat na ipapapod si Ramil Madriaga, an pigkonsiderar na self-proclaimed bagman, sa mga masunod na imbestigasyon.
