Pinunan kan Indonesia kan Sabado na mag-implementar nin pagbabawal sa paggamit nin social media para sa mga kaakian na wara pang 16 anyos.
Segun sa nasyon, an lakdang na ini an sarong kasimbagan sa nagdadakulang huma kan online pornography, cyberbullying, asin internet addiction sa mga jovenes.
Segun ki Communications Minister Meutya Hafid, an mga digital platform arog kan X asin Bigo Live an dagos nang nagsunod sa bagong regulasyon asin inayos an saindang minimum user age susog sa ley.
Pinatanidan man an ibang mga platform na dapat tulos nindang i-adaptar an saindang mga serbisyo, produkto, asin mga feature sa mga eksistidong regulasyon.
Tinawan duon ni Hafid na wara nin puwang para sa pagkompromiso pag-abot sa pagsunod sa ley, asin an gabos na negosyo na nag-ooperar sa Indonesia an obligadong magsunod sa mga eksistidong regulasyon.
Nagpahayag man an TikTok na padagos sindang makikoordinar sa ministry nganing maseguro an tamang pagsunod sa ley para sa mga account kan mga kaakian na wara pang 16 anyos.
An lakdang kan Indonesia an kasunod kan polisiya kan Australia na pig-implementar kan Disyembre, na parte kan mas mahiwas na global review kan epekto kan social media sa mga jovenes.
Dai pa sana nahahaloy, napag-araman kan sarong hurado sa Los Angeles na may paninimbagan an Meta asin YouTube sa danyos na dara kan “addictive design” sa sarong joven na babae, asin pigsugo an mga kompanya na magbayad nin $6 milyon na danyos.
Sa United Kingdom, inaprobaran kan upper house kan parlamento an pagbabawal sa social media para sa mga kaakian, na nagpapadakula kan presyur sa ibang mga gobyerno na sunudon man ini.
