Nag-abot na sa Pilipinas an sarong barko na may karga nin labi sa 700,000 na bariles nin krudo hale sa Russia, pirang aldaw makalihis na ideklara an state of national energy emergency huli sa tensyon sa Middle East.
An barkong Sara Sky, na may bandera kan Sierra Leone, na nagdara nin de-kalidad na krudo hale sa ESPO pipeline kan Russia asin nag-abot kan Lunes.
Segun sa mga documento, an consignee kan kargamento iyo an Petron Corporation, na iyo an nag-ooperar kan solamenteng oil refinery sa nasyon.
Naheling kan sarong mamamahayag an barko na nakaangkla sa Limay Port, kun saen yaon an Petron refinery.
Pigtutubudan na ini an pinakaenot na kargamento kan Russian oil pasiring sa Pilipinas sa laog nin limang taon.
Magigiromdoman na sinabi ni Ramon Ang, Chief Executive Officer kan Petron na nakikipag-ulay an kumpanya para sa posibleng pagbakal nin langis ale sa Russia, alagad nagsayuma siyang kumpirmaron an pag-abot kan siring na kargamento.
Labing naglalaom an Pilipinas sa imported oil, na an presyo kaini padagos na naglangkaw pagkatapos na maapektaran an mga suplay kan giyera na imbuelto an Estados Unidos, Israel, asin Iran, na iyo an nagin kawsa kan partial na pagsara kan Strait of Hormuz.
Enot kaini, sinabi ni Presidente Ferdinand Marcos Jr. na naghahanap an gobyerno nin manlaen-laen na sources nin langis huli ta pigkakarkulong madurar sana nin 45 aldaw an natatadang supply kan nasyon.
Mientrastanto, an Estados Unidos temporaryong pinagaan an nagkapirang restriksyon sa pagpabakal kan Russian oil, na nagtutugot sa pagbakal nin mga kargamento na nasa biyahe na sagkod Abril 11.
Segun man sa analyst na si Muyu Xu, pigkakarkulong 120 milyong bariles nin Russian oil an yaon sa dagat kan ipinaotob an polisiya, asin an kadaklan kaini posibleng dati nang pig-order kan mga kliyente hale sa China asin India.
Sa tahaw kaini, pinahiro kan Department of Energy an ₱20 bilyon na emergency fund, na segun ki Secretary Sharon Garin sarong lakdang nganing maseguro an supisyenteng suplay nin enerhiya sa nasyon.
