LEGAZPI CITY-Pinag-iingat an mga residente harani sa bulkang Bulusan sa provincia kan Sorsogon huli sa posibleng peligro kan pagbagsak kan mga volcanic materials, rock fragments, asin ashfall hale sa bunganga kan bulkan.
Segun ki Phivolcs Volcano Monitoring and Eruption Prediction Division Chief Mariton Bornas, sa intrevista kan Bombo Radyo Legazpi na nagtetenir na halangkaw an volcanic earthquakes kan bulkang Bulusan asin kadaklan digdi, iyo an volcano tectonic earthquakes na nagreresulta kan pagbagsak nin mga gapo.
Dagdag pa niya na mantang maluluya asin mababaw an pinunan kaini, mas halangkaw an tsansa na magkaigwa nin mga steam driven o phreatic eruption asin shallow hydrothermal activity o pagsingaw na hale sa irarom kan bulkan.
Paliwanag ni Bornas na pirit ining nagluluwas sa crater asin kun maipon asin dai nakakaluwas, nagkakawsa ini nin phreatic o steam driven eruption.
Huli digdi, posible man na magkaigwa nin mga volcanic hazards arog kan short range o halipot na pyrocalstic density current o uson, ballistic projectile o an pagtapok nin gapo na peligroso kun makatama, siring man an epekto kan ashfall.
Dugang pa kan opisyal na hawig an mga nai-rekord na mga volcanic earthquakes sa seismic characteristics kan mga swarm volcanic earthquakes na nangyari bago pa man magsabog an bulusan kan Hunyo 2022 asin Abril 2025.
Pagirumdom kan opisyal na magtenir na alerto asin ibitaran an paglaog sa 4km danger zone huli ta anumang oras, posibleng magkaigwa nin phreatic eruption.
