LEGAZPI CITY-Pangapudan ngonian kan mga nasa sektor kan transportasyon ki President Ferdinand Marcos Jr. na masolusyunan an namamateang krisis sa produktong petrolyo.
Segun ki Philippine Confederation of Drivers Organization – Alliance of Concerned Transport Operators President Liberty De Luna sa intrevista kan Bombo Radyo Legazpi na isinagibo ninda an nationwide transport holiday ngani ipaabot sa Presidente an saindang mga pangapudan sa gobierno.
Dagdag pa niya na huli ini sa padagos na fuel increase kun kaya kinakaipuhan na ninda nin subsidiya, ayuda, asin service contarcting para sa mga pasahero na kinakaipuhan an saindang serbisyo.
Pinakasentro kan saindang sentimiento an maipaabot mismo kay President Marcos an sitwasyon kan mga kooperatiba asin korporasyon kun sain mawot nindang masolusyunan kan administrasyon.
Padifisilan man ini para sa sektor huli ta kun padagos na magtaas pa an presyo kan Diesel sa nacion, an dai na makakapagsderbisyo an kadaklan sa sainda asin naka-garahe na sana.
Tinawan doon ni De Luna na dai ninda intensyon o ginusto na maglangkaw an pamasahe kan mga commuters, alagad naghihingalo na an transport sector sa bilog na nacion.
Sinabi pa kan opisyal na kadaklan sa mga modernized an nakakagastos nin P2,000 sagkod P3,000 para sa fuel alagad nakakauli nin P250 sana sa kada aldaw sa sampulong oras nindang pag-biyahe.
Pigrerekomenda man kan grupo na magkaigwa nin moratorium o agreement, ibasura an oil deregulation law, asin halion an excise tax asin value added tax.
Mensahe man kan opisyal na kinakapiuhan an pagkakasararo asin pag-intindi orog na sa mga commuters para sa mga nasa sektor kan transportasyon para sa maayos nindang pag-seserbisyo.
