LEGAZPI CITY—Arestado an duwang lalaki kabale an sarong bagong pigbisto na Street-Level Individual sa ikinundusir na anti-illegal drug operation kan mga otoridad sa Barangay 32-San Roque, Legazpi City.
Binisto an mga suspek na sinda alyas “Choy,” 35-anyos, sarong electronics technician asin residente kan nasabing barangay; mantang binisto man an saiyang kaiba na si alyas “Bonnie,” 45-anyos, sarong delivery boy asin residente kan Barangay Putiao, Pilar, Sorsogon.
Naarestar an mga ini makalihis magpabakal sa poseur-buyer nin sarong pakete nin pigtutubudang shabu na may gabat na 0.2 gramo asin kantidad na P1,360 karibay kan P1,000 na buy-bust money.
Sa ginibo man na body search ki alyas “Choy,” narekober an buy-bust money asin kadugangan na limang pakete nin pigtutubudang shabu na may kabilogang gabat na 1 gramo asin kantidad na P6,800.
Kinundusir an operasyon sa koordinasyon sa Philippine Drug Enforcement Agency Regional 5, Legazpi City Police Station, PDEA-Albay Provincial Office asin Mobile Force Battalion 5.
Nahahampang an mga suspek sa kasong pagbalgar sa Section 5 asin 11 kan Republic Act 9165 o ang Comprehensive Dangerous Drugs Act of 2002.
