LEGAZPI CITY—Dae na naisalbar pa an sarong menor de edad makalihis na malamos ini sa Busay Falls sa Barangay Cabraran sa banwaan kan Jovellar, Albay.
Segun ki Jovellar Fire Station Officer in Charge Senior Fire Officer 4 Randy Rebua, sa intrevista kan Bombo Radyo Legazpi, binisto an biktima na sarong 16-anyos asin residente kan Purok 1 Barangay 1, Camalig, Albay.
Basado sa salaysay kan kaibahan kan biktima na nahiling ninda na nagkakaway-kaway an kamot kaini na naghahagad nin tabang kun sain tinabangan ini alagad dae ninda kinaya.
Medyo nahaluyan man an paghagad nin tabang kan kaiba huli sa nabigla suboot ini sa pangyayari kaya nag-abot sa haros 20-30 minutos nang nasa irarom kan tubig an biktima.
Sa pagresponde kan mga otoridad ginibo an cardiopulmonary resuscitation (CPR) sa biktima kan maiahon ini asin idinara sa ospital.
Segun sa opisyal na enot nang ipinagbawal an paglangoy sa lugar makalihis na may nalamos man digdi kan nakalihis na taon alagad may nagkapira suboot na mga joven an nagpipirit na maglangoy urog na pag warang bantay sa lugar.
Basado sa assessment kan Municipal Disaster Risk Reduction and Management Office na makusog an current kan busay pababa kaya kun dae tatao maglangoy o mapulikat an indibidwal an siertong mabubutong sinda paibaba.
Mientrastanto, mensahe ni Rebua sa mga magurang na pagiromdoman an saindang aki tuyong mapasiring sa mga salog o kadagatan na dae magpwersa kun dae tatao maglangoy nganing maibitaran an siring na mga insidente.
