LEGAZPI CITY- Nanindugan an grupong Bantay Bigas na kaibanan sinda sa mga magpapahayag nin pagkontra sa nagin anunsyo ni Vice President Sara Duterte sa plano kaining pagdalagan bilang presidente sa 2028 elections.
Segun ki Bantay Bigas Spokesperson Cathy Estavillo sa intrevista kan Bombo Radyo Legazpi na namatean na kan mga paraomang Pilipino an difisil na pamamalakad kan saiyang ama na si dating Presidente Rodrigo Duterte.
Paliwanag kaini na sa panahon kan Duterte administration, dakol na mga ley an naipasar na nagpasakit sa mga nagtitios na mga paraoma.
Liwat man na binalikan kan grupo an dae suboot maipaliwanag na paglustay kan bise presidente sa milyon-milyon na confidential funds.
Segun sa opisyal na amay na pag-anunsyar ni Vice President Sara an posibleng paagi ngani na mahiling kun makusog pa ini sa tahaw kan mga pigkakahampang na impeachment asin ngani na makuwa an simpatya kan mga namamanwaan para sa ama na si dating Presidente Duterte.
Nanindugan si Estavillo na warang matino na ginibo an bise presidente sa laog kan saiyang termino asin kan sekretarya pa ini kan Department of Education kaya dapat na lingawan na kaini an saiyang ambisyon.
