Binasura kan House Committee on Justice an duwang impeachment complaints laban ki Presidente Ferdinand Marcos Jr. makalihis na aprobaran an committee report na napag-araman na insufficient in substance an mga reklamo.
Sa botong 39-4-0, pormal na sinayumahan kan komite an mga reklamong isinangat ni Atty. Andre de Jesus asin an Makabayan bloc.
Segun ki Committee Chair Rep. Gerville Luistro, kaipuhan an malinaw na recital of facts nganing ikonsidera na supisyente an substance kan sarong impeachment complaint.
Idinagdag pa kaini na dai nakasumiter nin solidong ebidensya an mga nagreklamo nganing suportaran an saindang mga akusasyon.
An enot na reklamo nakasentro sa suboot “betrayal of public trust” manungod sa mga polisiya sa West Philippine Sea, mantang an ikaduwa nagtukar kan suboot kapabayaan sa pamamahala kan ekonomiya asin iba pang isyu.
Alagad, pigkonsiderar kan komite na parehong kulang nin substansya an mga ini.
Sa ibong kan desisyon, nanindugan an Makabayan bloc na padagos nindang ibubusol an accountability kan Presidente sa manlaen-laen na larangan, kabale na an foreign policy asin socio-economic issues.
An pagbasura kan mga impeachment complaints an nagbubugtak ki Presidente Marcos Jr. sa mas makusog na posisyon sa Kamara, na kontrolado kan saiyang mga kaalyado.
