LEGAZPI CITY-Nakahandang magtestigo an suboot dating bagman ni Vice President Sara Duterte na si Ramil Madriaga para sa magigin impeachment proceedings laban sa Bise Presidente kun ini an kasuguan kan Senado magin kan Kamara.
Sa sarong pahayag sinabi kan legal counsel ni Madriaga na si Atty. Raymund Palad na nakadepende pa kun siya matawanan nin subpoena ngani magatendir sa impeachment.
Segun kay Palad, huli sa pagsumiter ni Madriaga kan saiyang salaysaly, pwedisir ining ipaapod sa kongreso asin kan Ombudsman.
Afuera digdi, ikinakigkig suboot kan kampo ni Madriaga na nagamit an mga affidavit kaini sa pagsasangat kan impeachment complaints laban kay VP Sara.
Nakalaag kaya digdi an mga akusasyon ni Madriaga laban sa Bise mapadapit sa paggamit suboot kan kwarta hale sa operasyon kan Philippine Offshore Gaming Operations (POGO) asin mga drug dealers para sa saiyang pangangampaniya kan eleksyon 2022.
Mientrastanto, kinumpirma ni Palad na naghagad nin request sa saiya si dating senador Antonio Trillanes na bisitahon si Madriaga ngani pagolayan an iba pang laog kan affidavit.
Nakatakda man na magapela asin magsumiter kan saindang application an kampo ni Madriaga para sa sarong Witness Protection Program (WPP) huli sa mga death threats na nareresibe kaini.
