Pigsyerto ni Senate President Vicente Sotto III an kahandaan enkaso kaipuhan na mag-convene an Senado bilang sarong impeachment court.
Ini sa ibong kan saiyang pananaw na “makasupog sa bilog na kinaban” kun parehong ipa-impeach si Presidente Ferdinand Marcos Jr asin si Vice President Sara Duterte.
Sa ibong kan dae dapat suboot ini mangyari, kaipuhan man giraray na mag-andam an senado huli ta bako ini harayong posibilidad.
Nanindugan an Senate president na mapreparar man siya sa posibilidad na siya an magin presiding officer sa impeachment court, kun makaabot sa halangkaw na kapulungan an mga complaint.
Enkaso suboot na duwang complaint an sarabay na dadangugon, pwedesir na magtutok an Senado sa legislative agenda tuyong aga mantang magiging impeachment court ini sa hapon.
Pwedesir man suboot gamiton an schedule kan MWF (Monday-Wednesday-Friday) para sa sarong complaint asin an TTH (Tuesday-Thursday) schedule man an para sa pagdangog kan saro pang reklamo.
Sa ibong kaini, naglalaom an beteranong senador na dae pa ini mangyayari, huli ta magkakaigwa ini nin negatibong impresyon sa bilog na kinaban.
Sa presente, opisyal nang nakaresibe an Kamara de Representantes nin sarong reklamo sa impeachment mantang duwa pa kaini an pigsayumahan kan nakaaging semana makalihis na magbyahe pasiring sa Taiwan si House Secretary General Cheloy Garafil.
Piglalaoman man an panibagong complaint ki VP Sara sa Pebrero, kun nuarin matapos na an 1-year ban, gikan sa nakaaging complaint na isinangat laban saiya kan nakaaging taon.
