LEGAZPI CITY – Paramientras na ipinagbawal kan Pioduran Municipal Disaster Risk Reduction and Management Office an pag-agi kan mga magagabat na behikulo sa sarong spillway na nagkokonektar sa saindang banwaan asin sa Guinobatan, Albay.
Segun ki Pioduran MDRRMO Head Noel Ordoña sa intrevista kan Bombo Radyo Legazpi na an naunambitang spillway an nadistroso huli sa mga namateang makukusog na pag-uuran kan mga nakaaging aldaw.
Basado man sa ginibo nindang assessment an solamenteng mga motorsiklo sana an makaka-agi sa narumpag na agihan alagad may ipigbugtak man sindang pirang kondisyon arug na sana kan pag-agi tuyong banggi.
Ipagbabawal man ninda an pagbalyo enkaso maghalangkaw an lebel kan tubig asin magkaigwa nin pagbabaha urog na kun magkaigwa nin makukusog na pag-uuran asin an pagmamaneho nin burat asin pirut nganing malikayan an anomang dae piglalaoman na insidente.
Pigtaram pa kan opisyal na huli sa insidente an mapipiritan na magbaybay sa halabang byahe an mga commuter asin motorista na hale primer distrito nganing makapasiring sa segundo distrito kan provincia asin vice verza.
Dugang pa ni Ordoña na plano man nindang maghagad nin tabang sa mga magkakanigong ahensya kan Gobierno nganing isa-irarom an narumpag sa spillway sa rehabilitasyon alagad kun siya an hahaputon, mas maray suboot kun tulay na an gigibuhon imbes spillway.
