LEGAZPI CITY – Pigbuyagyag kan Disaster Risk Reduction and Management Office na duwang beses na nagkaigwa nin ashfall an ciudad kan Legazpi sa laog nin sarong aldaw katakod kan nagpapadagos na aktibidad kan Bulkang Mayon.
Segun ki Legazpi City Disaster Risk Reduction and Management Office head Engineer Miladee Azur sa intrevista kan Bombo Radyo Legazpi na nairehistro an enot na ashfall sa norteng barangay mantang nairehistro an ikaduwang ashfall sa hararayong barangay kan ciudad.
Pigkokonsidera ninda na an insidente sa pagbabago kan wind direction kawsa kan Bagyong Ada asin an pagkusog kan nairerehistrong pyroclastic density current o uson kun kaya napadpad ini sa ciudad na nasa southern part na kan Bulkan.
Piglalaoman ninda na mabago na naman liwat an wind direction huli ta makakabwelo na an epekto kan amihan makalihis na magrayo an bagyo sa kadagaan kan nacion.
Pagsyerto man kan opisyal na padagos sindang nakikipagkoordinar sa mga magkakanigong ahensya nganing maabisuhan an saindang namamanwaan partikularmente na an naka-istar hararani sa pamitisan kan Mayon.
Pagirumdom man ni Azur sa publiko na ibitaran an pag-inhale kan abo kan Bulkan sa paagi kan pagsulot nin facemask, pagtaklob nin dumog na malinig na tela, asin pagtenir sa mga kaharongan sagkod sa matapos an ashfall para sa saindang kaligtasan.
