Mapoon na sa mga masunod na aldaw an posibleng pinakamalipot na parte kan Amihan (northeast monsoon) season na kalimitang nangyayari sa huring parte kan Enero.
Poon ngonian na aldaw, makusog na pagbugso nin amihan an pigkakarkulo na magdadara nin malipot na duros pasiring sa Luzon na posibleng makaabot sa Visayas asin norteng parte kan Mindanao.
Huli kaini, piglalaoman na mababa liwat an temperatura partikular na sa Northern Luzon.
Posible man na mauran sa sirangan na parte kan nasyon huli sa northeast monsoon asin iba pang weather system.
May posibilidad na mas makusog pa an mga amihan surges sa mga masunod na semana, urog na sa enot na parte kan Pebrero.
Kan mga nakalihis na aldaw, 7.5 degrees Celsius an nairehistro sa kabuludan kan Cordillera, mantang 7.9 degrees sa kataraid na lugar sa parte kan Luzon.
