Uminabot sa labi 5,000 katawo an nagadan sa mga protesta sa Iran, kabali an mga 500 na security forces, segun sa sarong lokal na opisyal.
An mga “terorista asin armadong iriwal” iyo an suboot responsable sa pagkagadan kan mga inosenteng Iranian.
Segun man sa human rights group (HRANA) na nakabase sa Estados Unidos, 3,308 an kumpirmadong nagadan, mantang 4,382 pang kaso an pig-iimbestigaran, asin labi 24,000 katawo an naarestar.
Dakul na mga residente asin mga video sa social media an nagpahiling kan mga pwersa kan estado na madahas na nagpupogol sa mga demonstrasyon, kabali an direktang pambabadil sa mga nagpoprotesta, na kadaklan mga jovenes.
An pinakahalangkaw na numero nin mga nagadan an yaon sa Kurdish region sa hilagang-kanluran, kun saen aktibo an mga armadong separatist.
Magigirumdoman na an mga hiro-protesta nagsiklab sa Iran kan Disyembre 28 kan nakaaging taon huli sa krisis sa ekonomiya, sagkod na ini naghiwas sa mahiwasang mga pangapodan para sa pagtapos kan presenteng pamamahala kan presenteng rehimen.
Sa ibong kan mga aksyon kan estado, sinabi ni Supreme Leader Ayatollah Ali Khamenei na dai ninda ilalaag an nasyon sa gera, alagad pig-asegurar niya na an mga responsable sa kariribokan an papadusahan, kun saen binasol kan Supreme leader an Amerika asin Ukraine na suboot iyo an nasa likod kan rinibong mga paggadan sa laog kan mga hiro protesta sa saindang nasyon.
