LEGAZPI CITY- Ipinaliwanag kan sarong ekonomista na an padagos na pagluya kan kantidad kan piso an nangangahulugan na nagluluya an ekonomiya.
Segun sa Economist and Certified Public Accountant na si Dr. Emmanuel Onsay sa intrevista kan Bombo Radyo Legazpi na kinakaipuhan ining maresolberan sa urog na madaling panahon.
Marurumduman na buminagsak pa sa pinakahibabang lebel na P64.17 ang kantidad kan piso sa pagsasarado kan trading kasuudma.
Ipinaliwanag kan nasabing ekonomista na dakula an epekto kaini huli ta an mga transaksyon kan Pilipinas an bako sana sa panlaog kundi maging sa manlain pang nacion kun sain an dolyar an ipinagbabayad bilang standard currency.
Nangangahulugan ini na kun maluya an kantidad kan piso, negatibo an epekto sa ekonomiya huli ta an Pilipinas an mas nagagastusan.
Aminado si Onsay na nasa management kan ekonomiya an pagbaba asin pagtaas kan ribayan kan piso.
Dagdag pa kaini na an Bangko Sentral ng Pilipinas an pangenot na piloto kan ekonomiya kaya dapat na gumana an mga paagi kaini kun papano imamantenir an stable na Philippine economy.
