LEGAZPI CITY-Buminagsak sa pinakahababa an piso kumpara sa dolyar kan Hulyo 24, 2026 makalihis na umabot sa P61.84 kada US dollar, segun sa report kan Bangko Sentral ng Pilipinas (BSP).
Ini an pinakamaluya sa historya kan piso, mas hababa sa nakaaging record na P61.75.
An pagbaba huli sa padagos na tensyon sa Middle East na nagin rason kan paglangkaw kan presyo kan langis sa labing $100 kada bariles, na nagpalala kan inflation asin komersyo.
Segun sa mga ekonomista, posibleng mag-abot sa P62 an exchange rate kun magpapadagos an kariribukan sa rehiyon asin an halangkaw na demand sa dolyar.
Dati nang nagdeklara nin state of energy emergency si President Ferdinand Marcos Jr. ngani masimbagan an epekto kan naglalangkaw na presyo kan enerhiya sa nacion.
Mientrastanto, pigsierto kan Bangko Sentral ng Pilipinas na preparado ining makiaram ngani maibitaran an sobrang paghiro kan piso asin mamantenir an estabilidad kan ekonomiya.
Sa ibong kan pagluya kan ekonomiya, an papel kan gobierno asin kan BSP, nagtetenir na kritikal sa pagmantenir kan kumpiyansa sa merkado asin pagprotehir sa mga konsumidores laban sa dagdag na pagabat kan inflation.
