LEGAZPI CITY – An energy security asin food security an dapat suboot na pinakaprayoridad na pag-olayan sa nagpapadagos na ASEAN Summit sa Pilipinas.
Segun ki University of Santo Tomas Lecturer Dr. Brian Doce, sa intrevista kan Bombo Radyo Legazpi, kaipuhan tutukan kan ASEAN kun pano ini makakatabang sa problemang pan-ekonomiya kan nacion.
Ipigpaliwanag niya na an padagos na tensyon sa pagultanan kan US asin Iran an saro sa mga rason sa paglangkaw kan presyo kan gasolina.
An paglangkaw kaini, segun saiya, bako sana problema kan mga motorista kundi kan bilog ekonomiya huli ta gabos na sektor an nakadepende sa langis hale sa Middle East.
Kaakibat kaini an food security, huli ta kapag naglangkaw an presyo kan langis, naglalangkaw man an presyo kan pagkakan na dae na kayang bakalon kan kadaklan.
Ipigdugang pa niya na igwa nang mga diskusyon ngunyan manungod sa oil stockpiling kan Pilipinas asin sa regional power grid tanganing dai maapektaran an suplay nin kuryente.
Para saiya, ini an mga isyung pinakaharani sa sikmura kan mga Pilipino asin nangangaipuhan nin panhaloyang solusyon.










