LEGAZPI CITY- Inako kan Department of Information and Communications Technology (DICT) Bicol na nakaresibe na sinda nin request sa nagkapirang mga lokal na gobierno dapit sa pagkakaigwa nin libreng wifi sa mga evacuation centers.
Ini an sa tahaw kan nagpapadagos na aktibidad kan bulkang Mayon na nagresulta sa pag-ebakwar kan nagkapirang Albayano.
Segun ki DICT Bicol Director asin Assistant Secretary June Vincent Manuel Gaudan sa intrevista kan Bombo Radyo Legazpi na nakapag reliver na sinda nin nagkapirang starlink unit sa Philippine National Police.
Paliwanag kan opisyal na an PNP an magdi-deploy kan nasabing mga starlink units.
Sinierto kan opisyal na pirming preparado an ahensya ngani na magtabang sa mga lokal na gobierno kun kinakaipuhan kan saindang asistensya.
Katakod kaini, nangapudan man si Gaudan sa mga lokal na gobierno na tabangan sinda na pangatamanan an nasabing starlink units ngani na magamit nin mas haloy.
