LEGAZPI CITY – Nag-ebakwar na an mga residenteng naka-istar sa Mayon Unit Area sa Guinobatan, Albay partikularmente na sa Barangay Masarawag huli sa huma kan Bagyong Ada.
Segun ki Kagawad Romollo Llona sa intrevista kan Bombo Radyo Legazpi na basado sa ibinabang kasuguan kan Gobierno Provincial, maabot sa poco mas o menos 1,500 pamilya an dapat i-ebakwar na katampad kan saindang gabos na residente.
Ginibo suboot an pagpapa-ebakwar huli sa huma nin flashflood urog nang permihan ining namamatean sa saindang Barangay enkaso nagkakaigwa nin makukusog na mga pag-uuran.
Poon man kasubanggi an nakakamate na nin padiit-diit na pag-uuran an saindang banwaan.
Pigtaram pa kan opisyal na pinili kan ibang padre de pamilya na magpawalat sa saindang mga kaharongan nganing may magbantay sa posibleng huma kan mga mararaot na elemento.
Wara pa suboot na kasyertuhan kun hasta nuarin matenir an saindang mga residentes enkaso dae na maka-apektar sa rehiyon kan Bicol an naunambitang bagyo.
Pangapodan ni Llona sa saindang namamanwaan na magsunod sa mga kasuguan na ipigpapaluwas kan Lokal na Gobierno asin Gobierno Provincial nganing maibitaran an pagkakaigwa nin casualty sa mga siring kaining pangyayari.
