Ipig-orgulyo kan Armed Forces of the Philippines (AFP) na nagin “very fruitful” an taong 2025.
Ini an ipighayag ni AFP Spokesperson Col. Francel Padilla, huli sa mga mayor na kapangganahan sa internal security, territorial defense, asin humanitarian assistance and disaster response (HADR).
Segun ki Padilla, dakula an ibinaba sa numero kan mga lokal na teroristang grupo, partikularmente an mga communist terrorist groups na nagbubukas kan mga dating conflict-affected areas para sa turismo asin pag-uswag.
Sarong dakulang parte kaini an pig-implementar na whole-of-nation approach, sa pakikipagtabangan kan manlaen-laen na ahensya kan gobyerno sa proseso nin katoninongan asin normalisasyon, kabali an NTF-ELCAC asin OPAPRU.
Manungod sa isyung teritoryal, pinakusog kan AFP an presensya asin pagpatrolya kaini sa Sulnupan na Dagat kan Pilipinas tanganing idepensa an soberaniya kan nasyon, kasabay kan pagsuporta sa operasyon kan BFAR asin Philippine Coast Guard.
Ipinahayag man kan AFP an saindang marikas na pagresponde sa mga kalamidad sa 2025, kabale an serye nin mga bagyo asin linog sa Cebu, kun saen an militar an nangengenot bilang mga first responder.
Napakusog man an kakayahan kan AFP sa pagresponde sa kalamidad sa paagi kan prepositioning kan mga assets asin training kan mga personahes.
Manungod sa modernisasyon, sinabi ni Padilla na padagos an pagkuwa nin mga bagong kagamitan sa irarom kan Re-Horizon 3, kabali na an mga darakulang barko na piggagamit bako sana sa depensa kundi magin sa HADR asin medical missions.
Pinakusog asin pinahiwas man kan AFP an relasyon kaini sa mga kaalyadong nasyon sa paagi nin mga kasunduan arog kan Status of Visiting Forces Agreement asin Reciprocal Access Agreement, bilang parte kan katuyuhan na mamantenir an malaya asin bukas na Indo-Pacific.
Pigsierto kan AFP na an mga inisyatiba kaini sa katoninongan, seguridad, asin pagtabang sa mga namamanwaan magpapadagos sa mga masunod na taon.
 is proud that the year 2025 has been "very fruitful". This was revealed by AFP Spokesperson Col. Francel Padilla, for major achievements in internal security, territorial defense, and humanitarian assistance and disaster response (HADR).){kind=link}