LEGAZPI CITY-Pig-ebakwar na an nasa apat na mga pamilya kompwesto kan 16 na indibidwal hale sa Barangay Muladbucad sa Guinobatan Albay kasunod kan posibleng aktibidad kan Bulkang Mayon.
Segun kay Guinobatan Municipal Police Station Chief of Police Police Lieutenant Colonel Joseph Imperial sa intrevista kan Bombo Radyo Legazpi na nasa apat na pamilya an saindang inasisteran pasiring sa Guinobatan Community College Center katuwang an iba pang ahensya asin an lokal na gobierno.
Pig-oobserbaran na man ninda an kondisyon kan Bulkang Mayon asin nakikipagkoordinar na sa Municipal Risk Reduction and Management Office (MDRRMO).
Nagkokondusir na man nin border check inspection an kapulisan sa 6km permanent danger zone kun sain nakasulot na an saindang mga personnel nin ‘N95 Mask’ para sa seguridad mantang wara pa man nin abiso manungod sa pagkakaigwa nin ashfall.
Padagos man an direktiba kan kapulisan ngani maibitaran an pagtukad kan mga indibidwal harani sa palibot kan Bulkang Mayon.
