LEGAZPI CITY-Nagpahayag nin pagkahandal an Pilipinas asin Estados Unidos sa ikinasang military exercise kan China sa palibot kan Taiwan, na pigsasabing nagpapalangkaw kan tensyon asin peligro sa katoninongan asin katatagan kan rehiyon.
Sa sarong pahayag, sinabi ni Thomas “Tommy” Pigott, Principal Deputy Spokesperson kan U.S. Department of State, na an mga lakdang asin retorika kan China laban sa Taiwan an nagpapalala sa tensyon.
Pigenganyar kan Estados Unidos an Beijing na punduhon na an military pressure laban sa Taiwan, asin makipagdayalogo sa makabuluhan na paagi.
Liwat na tinawan doon kan Estados Unidos an suporta kaini a katoninongan asin katatagan sa Taiwan Strait asin an pagtutol sa anumang pagbabago sa nasabing sitwasyon orog na kun magkaigwa nin puwersahan.
Nagpahayag man nin pagkahandal an Department of National Defense (DND) sa mga aksyon kan militar asin coast guard kan China sa palibot kan Taiwan.
Tinawan doon kan Pilipinas an importansya kan pagrespeto sa internasyonal na ley asin matoninong na paagi susog sa mga regulasyon kan sarong rehiyon.
Liwat na pinagtibay man kan ahensya an suporta kan Pilipinas sa sarong malaya, bukas, matatag, asin rules-based na Indo-Pacific, kun sain an mga dai pagkakasinabutan an naglulutas sa matoninong na paagi nin warang panlilinlang, pamimirit o pananakot.
