LEGAZPI CITY-Naglagpas sa piglalaoman na numero kan mga international passenger sa Kapaskuhan, basado sa opisyal na report kan Bureau of Immigration (BI).
Segun sa ahensya, na kan December 23, labi sa 61,000 katawo an nairehistrong nagabot sa gabos na international port sa nacion.
Sa nasabing numero, nairehistro kan Ninoy Aquino International Airport (NAIA) immigration officers an sagkod sa 49,176 international arrivals, sa kaparehong aldaw.
Sa kabilugan uminabot na sa 61,658 arrivals an nairehistro kan nacion mantang an departures nagrapado na sa 66,655, susog sa opisyal na international passenger traffic records.
Sa katahawan kaini, halangkaw na an passenger traffic, alagad nagtetenir man liwat suboot an maayos na operasyon sa mga pantalan asin eropuerto kan nacion, afuera sa nagkapirang pagkakataon na nagkakaigwa nin halabang pila sa processing.
Bilang tugon, nagdeploy pa an Bureau of Immigration nin dugang na 132 immigration officers sa bilog na nacion mantang nakaaktibo man an nagkapira pang mobile immigration counters sa mga high-traffic terminal.
Magtetenir na naka-alerto an nasabing opisina hasta sa enot na semana kan Enero, 2026 kun sain laoman na magpapadagos an dagsa kan kadakol na pasahero sa mga pantalan asin eropuerto.
