LEGAZPI CITY-Matumal an barakalan nin prutas sa Legazpi City Public Market ngonian na aldaw nin Kapaskuhan alagad pinagaatisiparan man giraray kan mga paratienda an halangkaw na demand pagabot kan Bagong Taon.
Segun kay Sharime Geroy, saro sa mga paratienda kan prutas, sa intrevista kan Bombo Radyo Legazpi na nagpoon sinda magpabakal nin prutas kan Disyembre 22 asin nagin maluya ini ngonian na kapaskuhan huli sa pag-uuran asin diit an mga tawo.
Piglalaoman man niya na makusog an bentahan sa pagabot kan Bagong Taon.
Dagdag pa niya na nagaalangan magbakal an mga tawo huli sa paghalangkaw kan presyo kan mga barakalon.
Sa presente susog sa paratienda, naghalangkaw an presyo kan sadit na klase kan Apple na nasa P15 na dating P10 sana, an Red Apple naman nasa P50 kada kilo na dating P40 sana.
Naglangkaw man suboot an presyo kan batag na nasa P100 kada kilo na dating P80, an Pakwan nasa P60 na an kada kilo na dating P40 sana.
Mantang nagbaba man an presyo kada kilo kan Mangga na nasa P170 na sana, dating nasa P180.
Nasa P300 man an kada kilo kan Mangosteen asin an Ubas nasa P200 an kada kilo.
Dagdag pa kan paratienda na naghahalangkaw an presyo kan barakalon huli sa iba na an henerasyon sa ngonian kasabay man an paglangkaw kan presyo kan bagas asin sira.
Pigaantisiparan man an orog pang paghalangkaw kan mga presyo kan prutas sa Disyembre 30-31.
Mensahe man kan paratienda sa gabos na mag-budget, magbakal nin prutas na amay, asin magpili nin marhay na klase nin prutas asin warang danyos ngani dai sinda malugi.
