LEGAZPI CITY – Uminabot na sa 9 na boga an nakumpiskar kan mga kapulisan sa ciudad kan Legazpi sa pagpapa-otob kan City Ordinance No. 14-0016-2018 o an Regulating the Sale, Distribution, Possession, and use of Fire Cracker.
Segun kay Legazpi City Police Station Chief of Police Police Lieutenant Colonel Domingo Tapel Jr., sa intrevista kan Bombo Radyo Legazpi na obheto kan naunambitang lakdang na masyerto an kaligtasan kan publiko laban sa fire work related incident asin an saindang Ligtas Paskuhan 2025.
Pigdoon pa niya na maski warang pulbura an boga an pwedesir pa man ining magtaong peligro sa mga magamit kaini huli ta pigbubugtakan ini nin sarong klase nin fluid nganing pumutok na na pwedesir man ikasulo kan kublit kan siisay man na mabibiktima.
Paglinaw niya man na kukumpiskaron pa man liwat an mga kapot na boga kan siisay man sa ciudad maski dae maaktuhan kan saindang mga personahes na piggagamit ini huli ta nakasaad man ini sa naunambitang ordinansa.
Suhestyon man kan opisyal na maggamit na sana nin alternatibong paribok nganing maiselebrar an holiday season arug kan torotot, videoke, asin motor mantang kun dae man malikayan na maggamit nin paputok an dapat magin responsable asin gumamit kan mga dae ipinagbabawal.
Paglilinaw niya man na piggigibo sana ninda an mga naunambitang pagkumpiska nganing mabawasan an mga nairerehistrong firecracker-related injuries asin dagos na maipa-otob an zero casualty sa ciudad ngonian na holiday season.
Patanid man ni Tapel na mahahampang sa penalidad asin pagkakakulong an siisay man na makukuwaan o maaktuhan na naggagamit nin ipinagbabawal na paputok mantang pwedesir man na mapanimbag an mga magurang urog na kun menor de edad an madadakop.
