LEGAZPI CITY- Ipigheras kan Philippine Health Insurance Corporation an mga packages asin mga programa na pwedesir na maaprubitsaran kan publiko enkasong kinakaipuhan ngunyan na holiday season.
Ini an katakod kan patanid kan mga health experts sa posibleng paglangkaw kan mga kaso non ‘Holiday Heart Syndrome’ ngunyan na magseselebrar nin pasko asin bagong taon.
Segun ki PHILHEALTH Bicol Spokesperson Leri Ilagan sa intrevista kan Bombo Radyo Legazpi na mas pinahewas pa an mga programa ngani na matabangan an mga miyembro na nangangaipo nin asistensyang medikal.
Enkasong nangaipo an sarong pasyente in 24 hours confinement, pwedesir na mag-avail nin inpatient benefits sa mga accredited facilities kan ahensya.
Afuera digdi, nago-ofresir na man ngunyan nin mga outpatient emergecy care benefits na pwedesir na mapakinabagan kun dae man kaipuhan na ma-confine kan pasyente.
Dugang pa ni Ilagan na epektibo na man an PHILHEALTH Yakap kun sain magtatao nin mga preventive care services para sa mga miyembro asin dependents kaini.
Obheto kan programa na maagapan an kamatean kan publiko asin dae mapabayaan na lumala pa antes na maipahiling sa mga Yakap clinic.
