LEGAZPI CITY-Pigpaliwanag ni Armed Forces of the Philippines (AFP) Chief Romeo Brawner Jr. na haloy nang nagtatao nin seguridad an Philippine Navy sa mga Pilipinong parasira sa West Philippine Sea.
Ini bago pa man magboot si President Ferdinand Marcos Jr. sa Philippine Coast Guard na pakusugon an proteksyon para sa mga parasira na naglalayag sa West Philippine Sea.
Katakod ini kan water cannon na pag-atake kan mga sakayang pandagat kan Tsina laban sa mga Pilipinong parasira sa Escoda Shoal, kun sain 4 an nairidong Pinoy asin nadanyaran an saindang fishing boat.
Sinabi ni General Brawener na dai na ninda pigkokonsidera an mga aksyon kan Tsina sa West Philippine Sea bilang grey zone activities, imbes inaapod ninda an mga aksyon kan Tsina kun ano talaga an mga ini, bilang ilegal, mapirit, agresibo asin mapandaya.
Saiyang sinabi na mantenidong whole-of-nation approach an saindang kasimbagan sa ginibo kan China kun sain makikipagtabangan digdi an Philippine Coast Guard, Bureau of Fisheries and Aquatic Resources (BFAR) asin Philippine Navy.
