LEGAZPI CITY – Nanindugan an grupong Bantay Bigas na kaipuhan kan mga paraooma ngonian iyo an pag-review kan RA 11203 o an Rice Tariffication Law asin bako an pagtaas kan taripa sa imported rice.
Segun ki Bantay Bigas Spokesperson Cathy Estavillo sa intrevista kan Bombo Radyo Legazpi na an naunambitang ley an numerong unong rason sa pagbagsak kan kabuhayan kan mga paraooma.
Tinuyaw niya man an kadakol na Executive Order na ipinaluwas ni Presidente Ferdinand Marcos Jr. na dae man nakakatabang sa mga ordinaryong paraooma kundi mas urog pang nagpalugi sa sektor kan agrikultura.
Punto niya na dapat ibasura na an Rice Tariffication Law huli ta nagpapadagos an pagtaas sa cost of production kan mga paraooma sa ibong kan igwang ibinugtak na price ceiling an gobierno.
Pigtaram pa kan opisyal na punduhan na kan gobierno an saindang mga pakulo huli ta nagtetenir na halangkaw an presyo kan bagas sa mga pampublikong merkado.
Kabale man sa pigtutukdo niya man na rason sa dae matapos-tapos na pagtaas kan bagas iyo an piggigibong monopolyo kan mga pribadong sektor sa presyuhan kan mga paroy maski may ipina-otob na import ban an gobierno.
Pagdoon pa ni Estavillo na dapat isipon kan presenteng administrasyon an interes kan mga paraooma asin bako an interes kan mga importers kun mawot nindang mapababa an presyo kan bagas.
