Kinumpirmar kan Department of Justice na an mga kaso na pigkakahampang kan contractor na si Sarah Discaya ibabalyo hale sa sarong korte sa Mindanao pasiring sa Visayas.
Sa paghahapot kay Atty. Polo Martinez, Justice Spokesperson, an mga kasong nasa Regional Trial Court kan Malita, Davao Occidental suboot an dadarahon sa Lapu-lapu City kan Cebu.
Kasunod ini kan pagbalyo hale sa Digos City pasiring sa Regional Trial Court of Malita kan mga kaso nin ‘malversation of public funds through falsification of public documents’ asin pagbalgar sa Republic Act No. 3019 o Anti-Graft and Corrupt Practices Act.
Kun magigirumduman, sa pinaluwas na pahayag kan Korte Suprema, pinaliwanag ni Spokesperson Atty. Camille Sue Mae Ting na an pagtransfer o ‘transmittal’ kan mga kaso poon pa kan isangat ini kan Office of the Ombudsman sa Malita asin an Digos Regional Trial Court sana an nag-ako kaini.
Magigirumduman na nagsangat nin kaso nin graft asin malversation an Ombudsman na nag-ugat sa pagkaimbwelto kaini sa suboot ghost infrastructure project sa Davao Occidental na pinondohan nin haros P100 milyon.
Segun sa tagapagtaram kan Department of Justice na si Atty. Polo Martinez, an pagbalyo nin mga kaso an sarong inisyatiba kan korte katakod kan mga designadong special courts na tutukan an mga kaso may kinaaraman sa flood control projects anomalies.
Sa ibong kaini, aminado ini na wara nin kasegurohan kun may ipapaluwas na mandamiento de aresto para sa contractor na si Sarah Discaya.
Nasa korte na suboot an desisyon kun nuarin ipaaaresto an nasabing akusado.
Sa presente, nagtitinir na sa kustodiya kan National Bureau of Investigation si Sarah Discaya makalihis na boluntaryong isuko an saiyang sadiri sa kawanihan.
Temporaryo siyang nakaluwas kan nakaaging aldaw, Disyembre 16, nganing hampangon an hearing kan iba pang kaso na saiyang pigkakahampang arog kan ‘graft’ asin ‘theft’ sa ciudad kan Malabon.
