Inihayag kan Palasyo Malacañang na bukas an gobierno sa paggamit kan United Nations Convention Against Corruption (UNCAC) nganing makatabang sa pagtunton asin pag-aresto sa nagdemitir na si dating Ako-Bicol Party-list Representative Elizaldy Co.
Afuera pa ini sa paghagad nin Red Notice sa International Criminal Police Organization (Interpol).
Segun ki Palace Press Officer Claire Castro, igwa nin mekanismo an UNCAC para sa international cooperation asin mutual legal assistance, alagad piglinaw na wara pang pormal na koordinasyon sa Department of Justice sa bagay na ini.
Ipinasa na suboot kan DILG an bagay na ini sa Commission on Transnational Crime, asin segun ki Interior Secretary Jonvic Remulla, kabale ini sa mga pig-aadalan na mga opsyon.
Magigirumduman na kan Nobyembre 21 kan pig-anunsyo ni Presidente Ferdinand Marcos Jr. na igwa nang mandamiento de aresto kontra ki Co asin 15 iba pa katakod kan P289.5-million na substandard flood control project sa Oriental Mindoro.
Nakaladkad man an saiyang pangaran sa suboot P35-bilyon na budget insertions sa flood control projects sa Bulacan.
Si Co presenteng pigtutubodan na yaon sa Portugal asin pigbabareta na igwa nin Portuguese passport asin sarong “golden visa,” na sarong posibleng rason kun nyata siya nakakahiro nin malaya sa Europa.
 to help track down and arrest former Ako-Bicol Party-list Representative Elizaldy Co.){kind=link}