Kinumpirmar ni Senador Robin Padilla na dai siya madalagan sa 2028 national elections, kasunod kan mga espekulasyon manungod sa saiyang posibleng pagdalagan liwat sa Senado.
An pahayag ni Padilla bilang kasimbagan sa post sa social media ni Jack Argota, sarong vlogger asin supporter ni Vice President Sara Duterte na nagpahiling nin lineup kan mga personalidad na saiyang susuportahan enkaso madagos si Duterte sa saiyang presidential run sa 2028.
Kabali sa ladawan si Senador Francis “Chiz” Escudero, Senador Alan Peter Cayetano, Jimmy Bondoc, asin iba pang mga pulitiko.
Sa comment section kan post, nagpasalamat si Padilla ki Argota alagad hinagad kaini na halion an saiyang pangaran asin ladawan, na nagpapahiling na dae siya madalagan sa 2028.
An saiyang pahayag marikas na nagin viral sa online, na nagkuwa nin magkakalaen na reaksyon gikan sa mga netizen.
Dakul an nag-agyat saiya na pag-isipan giraray an saiyang desisyon asin ipadagos an saiyang termino, o maghanap pa ngani nin mas halangkaw na posisyon sa gobyerno.
An desisyon ni Padilla nakalinya sa mga nakaaging pahayag na saiyang ginibo ngonian na taon.
Sa sarong pahayag kan Abril, sinabi kan senador na an saiyang pagdemitir sa politika sa 2028 parte kan kasunduan na ginibo ninda kan saiyang agom na si Mariel Rodriguez-Padilla nganing magtao nin mas dakol na oras sa saindang pamilya.
Susog ki Padilla, an saiyang trabaho sa Senado nag-uubos nin 95% kan saiyang oras, bagay na iyo an ikinahandal kan saiyang pamilya.
