LEGAZPI CITY – Bako katanggap-tanggap para sa election watchdog an House Bill 6771 o an Anti-Political Dynasty Bill na isinunad ni Speaker Faustino “Bojie” G. Dy III asin Deputy Majority Leader Sandro Marcos.
Segun ki Kontra Daya Convenor Danilo Arao sa intrevista kan Bombo Radyo Legazpi na sa paagi kan isinunad na bill an garing nagigin normal na nagkakaigwa nin magkamag-anak sa local asin national level.
Dapat suboot na pagtuunan nin pansin an mga naenot asin pending na Anti-Political Dynasty Bill na isinunad kan pribadong grupo asin sektor kaysa sa kaparehong bill isinunad ni speaker Dy asin Representative Marcos.
Dae man dapat pagtugutan na magin ley an bill na isinunad kan duwang naunambitang mambabatas huli ta an mga pulitikong gikan sa dinastiya an makikinabang kaini huli sa ipigbugtak na mga provisions na magigin insulto sa mga namamanwaan.
Pigtaram pa kan opisyal na sa presenteng panahon an haros sain na lugar an may harong an mga pulitikong gikan sa sarong dinastiya nganing magpalit na sana nin address sa saindang voters registration information nganing makapagdalagan sa manlain-laing posisyon.
Kun maipapa-otob suboot an House Bill 6771 an magpapadagos man liwat an mga dinastiya kan sarong pamilya huli ta sa irarom kaini an pigtutugutan pa man na magdalagan asin magtukaw an magkaka-pamilya sa manlain-laing lebel sa gobyerno.
Tinawan doon pa ni Arao na magpapadagos pa man an mga pamilyang nagdodomina sa sarong lugar huli ta dae man ipigbale kan mga mambabatas sa Anti-Political Dynasty Bill an mapadapit sa partylist system kan kongreso.
