LEGAZPI CITY-Dinipensaran kan sarong halangkaw na lider kan Kamara an bersyon kan anti-political dynasty bill na ipinasar kan kapulungan na makatotoohan asin sarong magayon na lakdang na dai nagibo kan nakalihis na Kongreso.
Segun kay Deputy Speaker asin La Union Rep. Paolo Ortega, ini an bersyon na katanggap-tanggap sa kadaklan na mga kongresista.
Obheto kan propwesto na maipaotob na an ley sa maabot na pirilian sa taong 2028 ngani ipahiling na seryuso an Kamara.
Inako ni Ortega na kadakol an nagbabatikos sa limitadong sakop kan propwesto, alagad tinawan doon niya na kadakol na sakripisyo ini huli ta haros 80 porsyento kan mga miyembro kan, hale sa mga politikong pamilya kaiba an saiyang sadiring pamilya sa La Union.
Sa irarom kaini, ipagbabawal an pagkandidato kan mga paryentes hasta second degree of consanguinity or affinity (arog kan aki o makuapo) sa parehong cluster o lugar kan nagtutukaw na opisyal.
Apektado man kaini an mga magturugan na presenteng nasa posisyon sa senado.
Ipinaliwanag ni Ortega na maagi pa an propwestong ley sa Senado asin bicameral conference, kun saen posible pa ining mapakarhay asin mabago.
Enot nang ipighayag ni House Majority Leader Sandro na lehitimo an mga puna sa Anti-Political Dynasty bill kan Kamara, alagad sinabi niyang an presenteng bersyon, bunga kan kompromiso ngani makakuwa nin bastanteng suporta gikan sa mga kongresista.
Segun pa kay Marcos, basado sa konsultasyon sa mga lider kan partido, posibleng mawaran nin bastanteng boto an propwesto kun mas magigion mahigot an mga probisyon kaini.
Aminado man siyang kadakol sa mga miyembro kan Kamara an kaiba sa political dynasty.
