LEGAZPI CITY – Nagpatanid an toxic watchdog group na Ban Toxic mapadapit sa posibleng huma kan mga kawatan na kontaminado nin peligrosong kemikal.
Segun ki BAN Toxics Campaigner Thony Dizon sa intrevista kan Bombo Radyo Legazpi na basado sa saindang findings an nahilingan man nin prominenteng kemikal na lead an mga kawatan na pang-aki sa manlain-laing merkado sa mga provincia.
Kahagadan ninda sa mga regulatory agencies an padagos na pag-monitor urog na ngonian na kapaskuhan kun sain dakol an nag-aaprobitsar kan mga kontaminadong prudukto na ipapangregalo sa mga kaakian.
Paliwanag niya na sa oras na ma-expose an mga aki sa mga kontaminadong kemikal maski dae direktang nakaputan an padagos kaining rarauton an hawak nin dae nagluluwas an sintomas.
Pigtaram pa kan opisyal na nagigin padifisilan ngonian sa pag-aram kan mga produkto an kinakaipuhan pang isairarom an mga kawatan sa testing nganing maaraman kun igwa ining kemikal na peligroso sa salud.
Suhestyon niya man sa mga mabakal nin pangregalong kawatan sa mga kaakian ngonian na holiday season na bakalon sana an mga produktong may etiquette, hilingon an kulay, asin dae magbase sa presyo nganing masyerto an kaligtasan kan makakaresibi kaini.
Pagdoon ni Dizon na kaipuhan nin pagkakasararo sa pagultangan kan lokal na gobierno, regulatory agencies para sa pagmomonitor kan mga nasambitang produkto asin an publiko para man sa pagigin rigmat nganing salbado an pagselebrar kan kapaskuhan.
