LEGAZPI CITY- Ibinasura kan Commission on Elections an election protest na ipigsunad ni dating Catanduanes gubernatorial candidate Bosste Cua kontra ki Governor Patrick Azanza.
Segun sa gobernador sa intrevista kan Bombo Radyo Legazpi na sinabi kan komisyon na warang diretsos si Cua na magsunad nin election protest huli ta enot na ining na-diskwalipika kan COMELEC En Banc sa pagkandidato huli sa pagigin Chinese citizen.
Marurumduman na enot na man a nagsunad nin disqualification case si Azanza kontra ki Cua huli ta nakalaag suboot sa birth certificate kaini na an parehong magurang niya an anas Chinese.
Paliwanag kan gobernador na maski pa ipinangaki na sa Catanduanes an sarong persona, dae nangangahulugan na kwalipikado ini na magdalagan sa posisyon sa gobierno huli ta bako man ini Filipino citizen.
Nanindugan man si Azanza na malinaw an nagin tingog kan mga taga Catanduanes na siya an pinili kan mga namamanwaan na mamayo sa island province.
Wara suboot na basehan an nagin mga alegasyon ni Cua na igwang sala o iregularidad sa boto sa pagultangan ninda kan nakalihis na pirilian.
