LEGAZPI CITY – Nakapreparar na an Legazpi City Public Safety Office mapadapit sa pagruso kan mga tawo ngonian na kapaskuhan.
Segun ki Legazpi City PSO Chief Octavio Rivero sa intrevista kan Bombo Radyo Legazpi na tutukan ninda an mga mall na piglalaoman nindang madakol an mga mapasyar sa mga masunod na mga aldaw.
Nakahanda na man an saindang mga personahes para sa posibleng deployment nganing magmando kan kamugtakan kan trapiko sa ciudad.
Padagos man an saindang paglinig sa mga kakalsadahan laban sa illegal parking nganing magin matuninong an byahe kan mga commuter asin motorista.
Nangapodan man si Rivero sa mga turista asin mapasyar sa ciudad na ibitaran an illegal parking nganing dae magkaigwa nin mga penalty.
