Inirekumenda kan panel of Ombudsman prosecutors sa Sandiganbayan an ‘no bail’ para kay former Ako Bicol Party-list Rep. Zaldy Co katakod sa kaso kaining pigkakahampang.
Kasunod kan maisunad an enot na flood control cases sa korte, rekomendasyon man kan Ombudsman na dae na makapagpyansa pa an dating mambabatas.
Segun mismo ki Assistant Ombudsman Mico F. Clavano, ini an rekomendasyon kan prosekusyon sa partikular na kasong malversation laban ki former Cong. Zaldy Co.
Susog pa suboot ini sa nakasaad sa ley asin sa paliwanag na naglagpas sa 8.8 million pesos an nadiskubreng ‘malversed funds’.
Mantang ipinahayag niya na an Ombudsman nagsangat man nin mosyon nganing magsagibo an korte nin ‘urgent raffle’ manungod sa mga kaso.
Hinagad man kan tanod-bayan an tulos na pagpaluwas nin ‘warrant of arrest’ asin ‘hold departure order’ kontra sa dating mambabatas.
Afuera ki Ako Bicol Party-list Rep. Zaldy Co, isinangat man an mga kasong kriminal laban sa nagkapirang opisyales kan Department of Public Works and Highways sa Region IV-B, asin sa board of directors kan Sunwest Corporation.
Nahahampang sinda sa Malversation of Public Funds through Falsification of Public Documents, asin pagbalgar kan Section 3e kan Republic Act 3019 o Anti-Graft and Corrupt Practices Act.
Mientrastanto, saro pang kaso an isinangat laban kay Zaldy Co huli sa pagbalgar sa Section 3(b) kan RA 3019 huli sa pagresibi nin ‘unwarranted financial’ o ‘pecuniary benefits’.
An mga nasabing kaso an may kinaaraman sa maanomalyang proyekto asin konstruksyon kan Road Dike sa Mag-Asawang Tubig River sa Naujan, Oriental Mindoro sa Region IV-B.
Nanindugan si Assistant Ombudsman Clavano na basado man ini sa inspeksyon kan Department of Public Works and Highways, na suboot naggamit nin mga substandard na materyales.
