LEGAZPI CITY – Ipigdoon kan sarong Peace Studies Professor na nagkakaigwa na nin kamalayan an mga namamanwaan sa mga nangyayari sa nacion.
Ini an kasunod kan ikinasang 3 day peace rally sa Metro Manila na nagpoon kan November 16 asin madurar sagkod sa November 18, 2025.
Alagad segun ki Bicol University Peace Studies Professor Dr. Herbert Rosana sa intrevista kan Bombo Radyo Legazpi na kun matatapos sana ini sa mga rally asin wara man nin mangyayaring pagbabago an magtetenir man ining warang praktikal na katuyuhan maski pa naipaabot sa gobierno an saindang pangapodan.
Nagigin problema man suboot sa mga serye nin hiro protesta iyo an kun mahahaloan nin ibang agenda huli ta nag-iiba an pagkakasararo kan publiko asin dae magigin malinaw an saindang obheto na kondenahon an korapsyon sa gobierno.
Siring man kan mga nangyayari sa ibang nacion an may ibang mga rally an pigbabayadan partikulamente na an mga mawot nin distabilasyon huli ta nagtutubod siya na makusog an impluwensya kan kwarta sa sarong tawo.
Pigtaram pa kan propesor na madepende na man sa mga lider kan mga nagpo-protesta kun kakayanon na magsagibo nin mga rally na dae nauuli sa kadahasan urog na kun obheto man sana ninda iyo an kondenahon an nangyayaring korapsyon sa nacion.
Sa mga wala-toong hiro protesta, masasabi niyang posible na magkaigwa nin people power revolution huli ta pwedesir na kumusog an pwersa kan publiko na mahantong man sa mapipiritan na an mga lideres na magdemitir sa saindang posisyon.
Paglilinaw pa ni Rosana na an mga Pilipino ngonian an maikukumpara niya sa taramon na “ningas kugon” kun sain kapag mainit pa an orolay an emosyonal pa sindang nakikisabay alagad marikas man sanang nalilingawan makalihis an pirang semana.
