LEGAZPI CITY – Nangapodan lokal na gobyerno an mga opisyales kan Barangay Victory Village South, Legazpi City na matawan nin bastanteng pagkaon an mga evacuees bago pa man mamatean an epekto ni Bagyong Uwan.
Segun ki Punong Barangay Basilia Capino sa intrevista kan Bombo Radyo Legazpi na labing kaipuhan ninda ini urog nang kadaklan sa saindang mga residentes an mga parasisira asin nag-abiso na man sinda na bawal nang maglawod para man sa saindang kaligtasan.
Kadaklan sa saindang mga residente an nagtetenir sa saindang pagtaraid na may halangkaw na harong mantang an iba man an nagche-check in sa mga hotel nganing paramientras na magtenir para sa saindang kaligtasan.
Pigkakarkulo man ninda na maabot sa labi 500 na mga pamilya an mapasiring sa saindang mga evacuation center huli ta saro an saindang barangay na prone sa pagbabaha tuyong igwa nin maraot nin panahon.
Patanid man kan opisyal sa saiyang mga residentes na mag-ebakwar nang amay huli ta dae na sinda ma-rescue sa oras na maghagupit na an epekto kan Bagyo huli ta kaipuhan man ninda asikasuhon an saindang mga pamilya.
Paglinaw niya man sa saindang mga nasasakupan na gigibuhan ninda nin paagi nganing magkaigwa sinda nin mga pagkakakan mantang nagtetenir sa mga evacuation centers.
Pagdoon pa ni Capino na pwedesir na abuton nin tulong aldaw an pagtetenir kan saindang mga residentes sa mga evacuation center base suboot sa forecast track kan ni Bagyong Uwan.
