Ipigkasar na kan gobierno an mga lakdang nganing mapauli nin nacion an nasa pocomas o menos na 200 OFW na biktima nin scam hub sa Myanmar.
Segun ki Migrant Workers Sec. Hans Leo Cacdac na an mga Pilipino an nakabalyo na sa border kan Thailand. Mantang wara pang sierto na petsa kun nuarin sinda makakauli, nakikipagkoordinar na an Department of Migrant Workers (DMW) sa gobyerno kan Thailand para sa saindang repatriation.
Dakol sa sainda an nawalat an pasaporte, kaya kaipuhan sindang mag-agi sa proseso nin dokumentasyon.
Dugang pa ni Cacdac, siyam na Pilipino an nakaabot sa Yangon. Padagos man giraray an DMW sa pagtanggap nin report mapadapit sa kabilogang numero kan mga Pilipinong biktima.
Liwat na pinagiromdoman kan ahensya an mga Pilipinong biktima nin scam hub sa Myanmar, o sisay man na may impormasyon mapadapit sa sindikato, na tulos ining ini-report sa sainda.
Mientrastanto, sinugo na ni Philippine National Police (PNP) acting Chief, PLtGen. Jose Melencio Nartatez Jr. an mga unit kan pulisaya na hanapon an mga sindikatong imbuelto sa illegal recruitment.
Nakikipagtabangan na an PNP sa saindang mga counterpart sa ASEAN nganing matabangan kun sisay an nagtatao nin pondo sa Transnational Scam Network.
