LEGAZPI CITY-Ipigbuyagyag ni Senador Francis “Kiko” Pangilinan na may makusog na ebidensiya na an mga sindikatong Chinese an kasabwat kan nagkapirang opisyal kan gobierno asin lokal na negosyante sa talamak na agricultural smuggling sa nacion.
Sinabi ni Pangilinan na pigpoprotehiran suboot kan nagkapirang kawani kan Bureau of Customs, National Bureau of Investigation, Philippine National Police, Department of Agriculture, Department of Justice, asin Bureau of Immigration an mga smuggler, na malayang nakapagpapaluwas nin mga produktong smuggled.
Dugang pa ni Pangilinan na nabibilog na suboot an “big picture” sa likod kan agri smuggling sa nacion, na kun ikukupara niya sa operasyon kan Philippine Offshore Gaming Operators (POGOs), kun sain may sindikatong hale sa China asin kasabwat na mga Pilipino.
Posible man suboot na an mga sira na hinabon sa West Philippine Sea an pigbabalik sa nacion bilang imported frozen fish, siring kan ₱68 milyon na kantidad kan mackerel hale sa China na idineklarang chicken poppers sa Subic.
Tinawan doon man ni Sen. Pangilinan na an agricultural smuggling an economic sabotage, na may padusang habangbuhay na pagkakakulong sa irarom kan ley sa nacion.
Ipigpunto man kan Senador na hasta sa ngonian an wara pa man giraray nin napapanimbag na agri smugglers kun kaya pigsisierto ninda na ipapadagos kan Senado an imbestigasyon ngani mapanimbag an gabos na imbuelto mapadapit sa agri sumggling sa nacion.
