LEGAZPI CITY-Pigkakarkulong nasa 300,000 na mga paraoma, parasira, asin mga trucker an makakaresibe suboot nin fuel subsidy na nagkakantidad nin P3 bilyon asin ipapanao ngonian na bulan sa irarom kan programang UPLIFT kan gobierno.
Ipig-anunsyo ini kan Malacañang kasunod kan report ni Agriculture Undersecretary Arrey Perez, kun sain pignotar na an inisyatiba parte kan tabang kan gobierno nganing mapagian an epekto kan El Niño asin halangkaw na presyo kan langis sa sektor kan agrikultura.
An mga paraoma, asin parasira maresibe nin one-time fuel subsidy na kantidad nin P5,000 para sa operasyon kan mga tractor, motorized banca, asin iba pang fuel-dependent equipment.
Mientrastanto, an P2,000 kada semana na fuel subsidy naman an itatao sa mga drayber kan mga delivery truck na nagdadara nin mga produkto hale sa mga omahan pasiring sa Metro Manila asin iba pang merkado.
Sa ngonian, nakikipagkoordinar na an Department of Agriculture sa Land Bank of the Philippines ngani maparikas an pagdistribwir kan ayuda sa paagi kan mga branch asin ATM kan bangko.
Pinag-iisipan man kan Toll Regulatory Board asin mga tollway operators an toll holiday o diskwento para sa agricultural delivery trucks sagkod sa Disyembre 31.
Sinabi ni Perez na naglalaom an ahensya na marikas na magkaigwa nin kasunduan sa mga operator kan tollway na maiimplementar an toll relief ngonian na bulan.
