LEGAZPI CITY – Nagkondusir nin pre-emptive evacuation an mga opisyales kan Barangay Victory Village North, Legazpi City sa saindang mga residentes huli sa huma ni Bagyong Ramil.
Segun ki Punong Barangay Toni Loveriza sa intervista kan Bombo Radyo Legazpi na basado sa saindang inisyal na datos an uminabot sa labi 100 na pamilya an nagtetenir sa manlain-laing pasilidad asin eskwelahan kan saindang barangay.
May mga residentes man suboot sindang nag-ebakwar sa saindang kataraid na may halangkaw asin matibay na mga kaharongan mantang pigmonitor man an mga ini kan saindang mga barangay health workers.
Pagdoon man kan opisyal na an pigkakahandalan kadaklan sa saindang mga residentes an pagtaas kan tubig-baha kun kaya an iba sa sainda an amay nang nag-ebakwar.
Ipigpasalamat niya man na nagrahay-rahay na an kamugtakan kan panahon sa saindang ciudad alagad dae man sinda nagpapakampante huli ta nagtetenir na huma an mga pag-uuran na dara kan nasambitang raot nin panahon.
Pagirumdom ni Loveriza na permihang mag-ingat asin dae na maghalat na kun magraot na an panahon an saka pa sana ma-ebakwar kun kaya magpreparar tulos tuyong may kalamidad.
