Pormal nang nanumpa ngonian na aldaw si former Department of Justice Secretary Jesus Crispin ‘Boying’ Remulla bilang ika-pitong Ombudsman kan nacion.
Pinangenotan mismo ni Supreme Court Senior Associate Justice Marvic Leonen an oath taking ceremony kaini sa Korte Suprema, ciudad kan Maynila.
An pagkakadesignar ni Ombudsman Remulla para sa nasambitang posisyon an kasunod kan siya pilion ni Presidente Ferdinand ‘Bongbong’ Marcos Jr. hale sa shortlist kan Judicial and Bar Council.
Sa saiyang panunumpa, siya an pigkokonsidera nang opisyal kan Ombudsman kapalit o kasunod kan pinalitan niyang nagretirong si Samuel Martires.
Huli kaini ipigheras ni Ombudsman Jesus Crispin ‘Boying’ Remulla na an nasabing posisyon an siyang kahagadan niyang mapagbigyan kan Presidente.
Kun kaya si President Ferdinand ‘Bongbong’ Marcos Jr. an igwa suboot nin bilin sa kanya makalihis na maidesignar bilang panibagong tanod-bayan.
Abiso suboot saiya na pangatamanan an pagpapanimbag sa mga pampublikong opisyal kan mga sangay kan gobierno bilang kasimbagan sa pighahanap-hanap kan taumbayan.
Mientrastanto, bilang former Justice Secretary, saiya mang ibinida an mga nagibo kaini para sa nasabing kagawaran.
Hale sa pag-poon niya kun saen iniladawan kaini bilang masalimuot, babayaan man suboot ining dakol nang nabago.
Saro sa mga dae malilingawan asin tumatak na linyahan kaini iyo an ‘the deadline is always yesterday’.
Kun saen dadarahon suboot an motto na sa pagpasiring asin paglipat sa panibagong posisyon bilang Ombudsman.
Kompyansa man an dating kalihim sa babayaan niyang mga opisyal nganing magpadagos pa man an serbisyo sa Department of Justice.
Mensahe sa mga ini na padagos an laban, laban para sa katarungan.
Makalihis an isinagibong oath taking ceremony, tulos ining sinundan nin panayam kay Ombudsman Jesus Crispin ‘Boying’ Remulla.
Saiyang ipigheras na pinaka-enot niyang tutukang kaso iyo an mapadapit sa flood control projects anomaly.
Hihilingon suboot an kagawaran kan Department of Public Works and Highways bilang bagong tanod-bayan.
