Sarong milyon na paraoma an makakaresibe nin P7,000 na cash aid kada saro sa irarom kan propuestong P6.7 trilyon na budget para sa 2026.
Ini an pig-anunsyo ni Speaker Faustino “Bojie” Dy III sa joint hearing kan House Committee on Agriculture and Food asin Committee on Ways and Means.
Sinabi pa ni Dy na an mga paraoma tatawan nin P7,000 na ayuda sa saindang nalugi huli sa hababang farmgate prices kan paroy.
Segun ki Dy, ini man an kasimbagan sa Executive Order 93 na paramientras na pigsususpendir sa pag-import nin bagas nganing maprotehiran an mga lokal na paraoma sa oversupply asin hababang presyo.
Dugang pa ni Dy na apwera sa cash aid, hinagad ninda ki Presidente Ferdinand Marcos Jr. na an gabos na subsidiya hali sa Department of Agriculture arog kan seed subsidy an itatao nin cash sa mga paraoma nganing mas masimbagan an saindang mga agrangay.
Sinabi pa ni Dy na dakul na mga paraoma sa saiyang probinsya sa Isabela an nagpapabakal kan saindang paroy sa labing hababa na presyo na nag-aabot sa P8 kada kilo na mas hababa sa P16 hasta P18 na kaipuhan nganing mabawi an saindang lugi.
Tinawan doon ni Dy na kun dae nakakakuwa nin ganansya an mga paraoma, magigin huma ini sa food security kan nasyon.
