LEGAZPI CITY-Ipighayag ni Senate President Pro-Tempore Ping Lacson na bako otomatikong iligal an budget insertions huli sa parte ini kan mandato kan mga mambabatas sa paghubog kan pondo kan nacion.
Sinabi pa niya na naabuso ini kan nagkapirang mambabatas, kairiba an mga kongresista na nagbugtak nin darakulang kantidad sa 2025 national budget.
Dagdag pa ni Lacson na nagabot sa labi P100 bilyon an kantidad kan insertions hale sa Senado para sa Department of Public Works and Highways (DPWH) pa sana, na nakatalaga sa manlain-laing proyekto kan imprastruktura kairiba na an flood control.
Basado man suboot sa nakuwa niyang impormasyon, sinabi ni Lacson na an dokumentong may listahan kan mga kongresistang igwang insertions para sa DPWH, an igwang kadakol na pages asin nakaayos an mga pangaran basado sa alpabeto.
Sinabi pa niya na posibleng lagpas an kantidad kan insertion hale sa Kamara kumpara sa insertions kan Senado.
Dugang pa kan senador na posibleng nakipagsabwatan an nagkapirang mambabatas sa mga tiwaling opisyal kan DPWH ngani makakuwa nin kickback hale sa mga proyekto, na rason para sa mas dakula pang pondo kan ahensya kaysa sa sektor kan edukasyon.
Mientrastanto, nanindugan man si Senate President Tito Sotto III na an mga amyenda o insertions, indibidwal man o institusyonal, an pigsasagibo sa panahon kan deliberasyon, an parte kan regular na proseso kan pondo kan nacion.
Pigsisierto man kan lider kan Senado na magkakaigwa nin mga reporma sa proseso kan 2026 budget ngani mas mapakusog an transparency asin accountability.