LEGAZPI CITY–Arestado an sarong lalaki makalihis na makumpiskar saiya an ilegal na badil sa Barangay Holjogon, Mobo, Masbate.
Binisto an suspek na si alyas “Damian”, 47-anyos, may agom, sarong paraooma asin residente kan nasabing lugar.
Nakumpiskar sa suspek an sarong unit na KG-9mm Luger na may serial no. 378214 asin may nakakabit na silencer; duwang pidaso nin steel magazine; asin 66 na pidaso nin bala para sa nasabing badil.
Naarestar si alyas “Damian” sa kusog kan search warrant na inisyu kan Regional Trial Court Branch 46, Masbate City sa isinagibong operasyon kan Criminal Investigation and Detection Group Masbate Provincial Force Unit (Lead Unit), Mobo Municipal Police Station, Masbate 1st Provincial Mobile Force Company, Masbate Provincial Intelligence Unit, asin Maritime Police Station.
Tulos na idinara an suspek asin an nakumpiskar na ebidensya sa Criminal Investigation and Detection Group Masbate Provincial Force Unit para sa magkakanigong disposisyon asin pagsusunad nin kaso.
Nahahampang an nasabing persona sa pagbalgar sa Republic Act 10591 o ang Comprehensive Firearms and Ammunition Regulation Act.
