LEGAZPI CITY – Ipigdoon kan sarong political analyst na dae magigin makapangyarihan asin dae magigin independent an ipigbilog na Independent Commission for Infrastructure na maimbestiga sa mga katiwaliang nangyari sa mga proyekto kan Gobierno kan nakaaging 10 taon.
Segun ki Atty. Michael Henry Yusingco sa intrevista kan Bombo Radyo Legazpi na haros sarong administrasyon sana an tutukan kan komisyon mantang an mga lakdang arug kan pagfreeze kan mga assets asin iba pa an kakaputan kan Anti-Money Laundering Council, Department of Justice, asin National Bureau of Investigation asin an Independent Commission for Infrastructure an masirbi sanang fact-finding body.
Dae dapat magpadara an publiko sa hype asin hampangon ninda an reyalidad na dae kaya kan komisyon na magpakulong, bawion an mga kwartang hinabon huli ta may mga magkakanigong departamentong may kapangyarihan na gibuhon ini.
Nahihiling niya man na enkaso may nahiling an Independent Commission, idudulok ninda ini sa Ombudsman asin bahala na suboot an Ombudsman sa pagsusunad nin kaso na pwedesir isunad sa Sandiganbayan.
Pigtaram pa ni Atty. Yusingco na maski komisyon nang pigkrear an Presidente, dae dapat magpundo an Ombudsman asin Commission on Audit sa pigsasagibo nindang sadiring imbestigasyon.
Punto niya man na nababaling an atensyon kan namamanwaan sa Independent Commission asin dae natututukan an mga imbestigasyon kan COA asin Ombudsman na sinda an may kapangyarihan na magpakulong nin korap na pulitiko asin bawion an mga hinabon na pondo kan banwaan.
Huli ta kapot kan presidente an komisyon pwedesir man sindang dae na magpaluwas nin subpoena sa sarong departamento asin suguon na sana kun mawot nindang hagadon an sarong dokumento alagad obligado sinda mag-isyu nin subpoena kun an mga dokumentong hahagadon ninda an hale sa sarong mambabatas.
Pagdoon liwat ni Yusingco na maski may makuwang findings an Independent Commission, magtetenir na Ombudsman an may kapot kan desisyon kun susunadan nin kaso an sarong pulitikong napatunayang imbwelto sa katiwalian.
