LEGAZPI CITY – Haloy suboot na pighalat kan sarong teachers group an pagpapaluwas ni Department of Education Secretary Sonny Angara kan guidelines para sa overtime asin overload pay kan mga paratukdo.
Segun ki Alliance of Concerned Teachers Chairperson Vladimir Quetua sa intrevista kan Bombo Radyo Legazpi na kadaklan sa mga paratukdo ngonian an nakakatanggap nin “OTY” o overtime without pay sana an maski labing naglagpas na an oras kan saindang trabaho.
Paliwanag niya man na afuera sa pagigin paratukdo an kadaklan sa sainda an duwa-duwa an nagigin trabaho sa eskwelahan arug na sana kan clinic-teacher, guidance-teacher, asin adviser huli ta dae nagbubukas nin plantilla position o additional teaching position.
Aminado man siya na may mga paratukdo an nagtatrabaho maski sabado asin domingo partikular na sa mga provincia asin ciudad sa Pilipinas.
Pigtaram pa kan opisyal na kun pagbabasehan an National Expenditure Program, dae ninda nahihiling an katotohanan na maisasakatupadan an overtime pay huli ta warang naka-alokar digdi na pondo.
Pagdoon niya man na kapag nalate an paratukdo maski 20 minutes sana an nababawasan na mantang dae man pigbabayadan kapag nag-overtime kun kaya welcome development para sainda an nasabing guidelines.
Suhestyon niya man na pondohan muna an overtime pay huli ta kun bilyon bilyon an pigkukurakot suboot sa Department of Public Works and Highways an dapat na i-rechannel ini sa DepEd an pondo para sa benipisyo kan mga paratukdo.
Pangapodan man ni Quetua na ilipat na sa education sector an pondo na mapapaduman man sana sa bulsa kan ibang pulitiko asin itao na sainda an mga benipisyo bilang teachers day asin christmas gift na makakatabang kuta para sa pagpapa-uswag kan saindang trabaho.
